bangau oh bangau..

bangau oh bangau
kanapa ko kurus...
macamana aku tak kurus
ikan tia timbul....

panjang lagi sambungan dia ni... tadi pagi, sia mandi sambil nyanyi ni lagu. tiba-tiba sia teringat something... kita manusia jarang mengaku kesalahan kita, macam c bangau juga la.. kita misti kasi kait sama urang lain juga... napa tia siap laporan? si anu bulum bagi lapuran... tanya c anu, si gombiau bulum bagi data, tanya c gombiau, c bayau bulum bagi borang.. tanya c bayau, bos bulum bagi duit bikin bili printer punya ink... dan ada banyak alasan lagi di belakang..

tapi biasa bah tu.. manusia pertama di dunia pun sudah tunjuk tu perangai lepas makan buah larangan... God: napa ko makan tu buah yang sia cakap jan makan? Lelaki: sia tia mo makan tapi tu pompuan yang pujuk sia.. pompuan: sia tia mo makan tapi tu ular yang pujuk sia... ngam2 lagi kan ular juga yang salah last2..

maksudnya, kita tia salah (dalam pemikiran kita lah), yang salah si anu, si gombiau, si bayau... kalo dorang buat kerja dorang.. misti kita pun siap kerja juga...

lagi satu, kalo bos tegur, napa ko punya prestasi ni tia bagus ni... kebanyakan akan jawab macam ni kan? 'sia baru ni kali buat kureng sikit, sudah kana tegur... c kalabatu yang balik2 buat salah tia pun kana peduli'... tapi kita lupa, wise men cakap.. kalo ko mo jadi urang yang terbaik, bandingkan diri dengan yang terbaik...sampai bila-bila pun kalo kita terus kasi banding diri sama yang average ja prestasi dia di tempat kerja, memang pun tia dapat kita kasi naik kita punya prestasi... kan?

wel, apapun ia bergantung sama tafsiran masing2... ada urang suka komplen di belakang tapi di depan YES BOSS juga... ada yang komplen di depan tapi buat kerja yang bagus juga di belakang...

teringat sia sama satu dialog yang betul2 terjadi...

boss: hah, baru sampai opis? jam 10.30 baru masuk opis? kamarin bilang kereta rusak, hari tu cakap kunci rumah tertinggal... ni kali apa pula alasan ko?

kuli: anu bos, tapi sia jalan dari rumah jam 7.00 pg, kerita bulum siap lagi, sia naik bas... sampai telipuk, jem pula.. sia pun turun sebab takut lambat... manatau jalan kaki sempat sampai on time... tapi jerebu punya pasal, sia sesat sampai pulau gaya pula... sia penat jalan, si tunggu2 bas.. teda ... itu pasal sia lambat sampai...