something to think about...

sia kanal 1 urang, broker tanah, urang kita... kerja dia pujuk urang kampung untuk jual tanah sama tauki-tauki kaya. Dan dia akan pujuk berabis, sampaila itu urang terjual tanah dia dan c Broker ni pun dapatlah komisyen 25% persen dari harga tanah. dan ramailah yang sudah termakan umpan c broker, gara-gara mo kaya cepat... bayangkan kalo kana cakap ' kalo ko jual ni tanah, buli dapat 100 ribu. tapi, kalo kasi usaha ni tanah 100 tahun pun bulum tentu dapat 50 ribu...'

hmmm... bukanlah sia mo mengutuk pekerjaan dia. tapi yang sia kasian ialah urang kampung. ada yang dulu tanah dia lebih 50 ekar, temakan pujuk rayu c broker, dia jual hampir semua... itupun yang lain anak2 dia tia mo sudah kana jual. lepas dijual, dia beli kereta 2nd hand. tia sampai 1 tahun, kereta dia kena tarik dan sekarang dia menjadi tukang kebun di bekas tanahnya sendiri.

c broker bukan saja pujuk untuk jual tanah, tapi kalo tia dapat pujuk jual, dia pujuk gadai pula... ini pun ramai juga yang terkena umpan. dia punya ayat senang saja, ko bagi sia geran tanah, kita pigi kasi 'simpan' di tempat tauki X, dia bagi ko duit 5000, kita pigi kasi labur, dalam masa 1 bulan, ko buli dapat 50000... dan c urang kampung pun ramai2lah ikut... last2, duit 5000 pun tia dapat, tanah pula hilang.

Pada saya, kalo pun mo buat kerja begitu, janganlah sama urang kampung sendiri. kasian bah urang kampung... ramai yang kurang berpelajaran tinggi dan hidup agak miskin.. harta dorang cuma tanah, itupun C Broker ni mo kasi kana juga.. haiya, bapa sia pun hampir kena, nasib baik umpan sempat kana nampak...kalo tia..

ingat, nilai tanah makin lama makin naik... sekarang pun ada sudah urang yang sanggup main bunuh, main tipu, main rasuah untuk dapat tanah, jadi janganlah senang-senang ja jual tanah. kalopun mo jual, jual sama sia...